মুখ্য পৃষ্ঠা
লং ড্ৰাইভত ৰবীন্দ্ৰনাথ
==============
লং ড্ৰাইভত বিৰাইছে
ৰবীন্দ্ৰনাথ,
অ'কে সেলাম ঠুকছে
ঘাটাৰ পাশেৰ গাছগুলায় ।
ফুলগুলায়,
সম্ভাষণ জানাইছে
বুড়া পাহাড়েৰ পাথৰগুলায় ।
ৰবীন্দ্ৰনাথেৰ ঠোঁটত সিগেৰেট, গত ৰাইতেৰ নেশাৰ খানিকটা দুইচোঁখেৰ আবেশত
পথ চলতি লোকগুলায় দেখে ৰবীন্দ্ৰনাথেৰ এলটো কাৰ,
বেপৰোয়া চাল চলন
ঐ যে , কাণত মোবাইল নিয়া ড্ৰাইভিং সিটত ৰবীন্দ্ৰনাথ,
কাৰেৰ স্টিৰিওতে ধুমধাম
মিউজিক
নচিকেতাৰ গান,
ট্ৰাফিক জ্যামত মন্থৰ ৰবীন্দ্ৰনাথেৰ গাড়ী
মালিগাঁওয়েৰ আকটা ধাবাত থামিয়া যায় ৰবীন্দ্ৰনাথেৰ কাৰ,
ধাবাৰ ভিতৰাত আকটা ইন্টাৰভ্যুৰ আশাত নীলিম কুমাৰ
কাউণ্টাৰত দুই প্লেট পৰ্ক,
আৰ্ আকটা ব্লেন্ডাৰস প্ৰাইড
ফুল অৰ্ডাৰ দিয়া
সিট টানিয়া বসিয়াপড়ে ৰবীন্দ্ৰনাথ,
বিস্মিত নীলিম কুমাৰ,
দুইপেগ টানিয়া কয়,
দাদা, আকটা কবিতা শুনান
ধুৰ কবিতা !!
বিৰক্তিতে মুখ কোঁচায় ৰবীন্দ্ৰনাথ ।
বিৰবিৰিয়ে কয়,
দুনিয়াতে যত্তসব টাকাৰ
ধান্দা !
তাৰ থাকিয়া কোন এই ৰাজ্যত
কী কিছু ম্যানেজ কৰা যাইবে,
এন আৰ এইচ এমেৰ বাজাৰ
শুনছুং বেশ ভালা
বৈন্যাৰ ঠিকাতেও বুলে অঢেল
টাকা,
পি ডাব্লিউ ডি-ৰ খবৰ কি, পেপাৰেৰ বিজনেসও মন্দ
নাহায় !
আশ্চৰ্যচকিত হৈয়া যায় নীলিম
কুমাৰ,
এ কি কৈছে ৰবীন্দ্ৰনাথ !
কি কৈছে এইগুলা ?
এই কী ঐ ৰবীন্দ্ৰনাথ
যায় কবিতা লেখছিলেক,
গীতাঞ্জলি, দ্য সং অফাৰিংস
‘মানুষেৰ প্ৰতি বিশ্বাস
হাৰানো পাপ !’
আঁহঃ ! কি পৰিবৰ্তন,
বেশ ! বেশ!
মুড অফ হয়ে যায় ৰবীন্দ্ৰনাথেৰ ।
কি কবিতা,
কুঠৈ কবিতা,
কিসেৰ কবিতা !
এই পাগলে কয় কি !
ছাড়েকতো তোৰ প্ৰলাপ,
কবিতাতে কী কিছু পাল্টায় ?
কল্পনাৰসিকেৰ বাজে কালচাৰ! কাৰ জন্যে কবিতা ?
নিৰন্ন মানুষেৰ পেট নাভৰে কবিতাতে
সোনাগাছিৰ
বেশ্যাগুলায় কাবিতা লেখে ভদ্ৰ মানুষেৰ,
বৈন্যাত ধোওয়া ধেমাজী কবিতা লেখে ৰাজনীতিৰ মানুষেৰ
সংঘৰ্ষত নিহতেৰ আত্মীয়গুলায় লেখে
শোকেৰ স্বৰলিপি,
কবিতাৰ বিষাদ
বিব্ৰত, বিমূঢ় নীলিম
কুমাৰক ছাড়িয়া চলিয়া আসে ৰবীন্দ্ৰনাথ ।
আৰো,
আৰোও ড্ৰাইভিঙত ৰবীন্দ্ৰনাথ
এইবাৰ ৰবীন্দ্ৰনাথেৰ ঠোঁটত শিস,
এইবাৰে ৰবীন্দ্ৰনাথেৰ
ড্ৰাইভিঙত বসন্ত,
ব্ৰেক মাৰে, স্পীড বাড়ায়
ধীৰে ধীৰে খুলিয়া যায়
ৰবীন্দ্ৰনাথেৰ মুখা,
ভিজিয়া আইসে ৰবীন্দ্ৰনাথেৰ
দুয়োটা চোঁখ,
ঘাটাৰ পাশত খাড়া কৰায় গাড়ী
স্টিয়াৰিঙত মুখ ৰাখিয়া হুঁ হুঁ
কৰিয়া কান্দে ৰবীন্দ্ৰনাথ,
হুঁ হুঁ কৰিয়া কান্দে,
হুঁ হুঁ কৰিয়া কান্দে
কেনে কান্দে ৰবীন্দ্ৰনাথ ?
কেনে কান্দে, কেনে কান্দে
এতোদিন কী তাহৈলে ৰবীন্দ্ৰনাথ আকলা আছিলেক, নিৰ্বাসিত আছিলেক,
আছিলেক বিপন্ন আৰ্ ক্লান্ত !
মৰিয়া যাওয়া ৰবীন্দ্ৰনাথ
কুঠৈৰ থাকিয়া আসছিলেক,
কুঠৈ কাটায়ছিলেক দিনগুলান, কি খাছিলেক,
কুঠৈ ঘূমাইছিলেক এতোদিন
কী বিশ্বকবি কবিতা লেখছিলেক,
কফিহাউসেৰ
আড্ডাতে কী আছিলেক অ'য়
নাটক দেখছিলেক,
পড়ছিলেক খবৰেৰ কাগজ, ধৰ্ষণ বলাৎকাৰেৰ ছবিৰগুলান কী অ'ৰ সকালবেলাগুলানত গিলছিলেক ?
গত ৰাইতে স্বপ্নত ৰবীন্দ্ৰনাথ,
লং ড্ৰাইভত ৰবীন্দ্ৰনাথ,
ঘাটৰ পাশত গাড়ী খাড়া কৰিয়া কান্দিছিলেক
পথ চলতি লোকগুলায় দেখছিলেক ঐ দৃশ্য,
সিনেমাৰ মতো পাৰ হৈয়া যাচ্ছিলেক ঐ দৃশ্য
আৰ্ মিলিয়া যাচ্ছিলেক ৰবীন্দ্ৰনাথ
লং ড্ৰাইভে আসছিলেক
আৰ্ ঘাটাৰ পাশেৰ গাছগুলায়,
ফুলগুলায়
অ'ক সেলাম ঠুকছিল
সাৰা ৰাইত ধৰিয়া
লং ড্ৰাইভত আসছিলেক
ৰবীন্দ্ৰনাথ,
আৰ্ ভোৰবেলা চলিয়া গেছিলেক
আৰো কী কুনোদিন আসিবেক,
লং ড্ৰাইভত ৰবীন্দ্ৰনাথ
* মূল : বিকাশজ্যোতি শইকীয়া
* বুলিবদল : কন্দৰ্পজিৎ কল্লোল
